Аграрийтнень пурнакшнынзе «Паксянь чись»

Июнень 6-7-це читнестэ Лямбирень муниципальной райононь «Александровский» ПЗ ОАО-нть юрсо ютавтовсь «Паксянь чи» агропромышленной выставкась. Республиканть туртов те мероприятиясь теевсь уш паро коекс. Выставканть содавтызь республикань прявттнэ, велень хозяйствань предприятиянь важодицятне, главной инженертнэ, агрономтне, зоотехниктне, райононь администрациянь велень хозяйствань управлениянь прявттнэ, крестьянонь-фермерэнь хозяйствань азортнэ, велень хозяйствань вузонь ды техникумонь преподавательтне ды студенттнэ. Истя жо выставкантень сакшность инжеть шабра регионтнэстэ ды масторонть томбальде.
Васняяк сыцятне ваннызь велень хозяйствань техникань выставканть. «Александровский» велень хозяйствань предприятиянь паксясонть рядсек аравтозельть тракторт, комбайнат, тикшень ледемкат, культиваторт, сеялкат, эрьва кодамо прицепной инвентарь. Пек кецявты, тракторонь, комбайнань заводтнэ эзизь стувто крестьянонь-фермерэнь хозяйстватненьгак, сетненьгак, кинь модаст аволь ламо. Сынст туртов выставкасонть невтевить вишка тракторт, эйзэст понгавтневить кавто лемех марто вишка сокат, модамарень путомкат ды таргамкат.
«Паксянь чи» агропромышленной выставканть панжизь МР-нь Прявтось В.Д.Волков, МР-нь Госсобраниянь Председателесь В.В.Чибиркин, МР-нь Правительствань Председателесь В.Ф.Сушков, МР-нь Правительствань Председателень полавтыцясь – Велень хозяйствань ды продовольствиянь министрась В.Н.Сидоров.
Выставканть панжоманзо коряс пурнавозтненень поздоровт ёвтась МР-нь Прявтось В.Д.Волков.
– Те мероприятиясь республикасонть ютавтови уш аволь васенце ие, ды теевсь вадря коекс весе агропромышленной комплексэнть ды велень хозяйстванть марто сюлмавозь отраслятнень туртов, ды аволь ансяк эсенек Мордовиянь, истя жо Россиянь лия регионтнэненьгак. Течи выставкасонть невтеви велень хозяйствань отечественной ды омбо масторонь неень шкань техника ды оборудования, целанек 150 единицадо ламо. Техниканть нолдыцятнень ютксо кода Россиянь регионтнэ, истя жо Белоруссиясь, Англиясь, Германиясь, Польшась ды лия мастортнэ. Пек кецявты, выставкасонть продукцияст невтизь ламот эсенек республикань предприятиятне.
Тесэ истя жо улить аграрной наукань неень шкань разработкатне, племенной ракшатне ды ламо лия, мезенть марто сюлмавозь велень хозяйствань производстванть инновациянь касомась. Мон кеман, те выставкась пек вадря площадка предприятиятнень ютксо сюлмотнень кемекстамонть туртов, – мерсь Владимир Волков.
Выставканть панжомадо мейле инжетне якасть экспозициятнень ванномо. А мезть сёпомс, тесэ невтевсь пек ламо эрявикс техника. Течи истямо техникавтомо велень хозяйстватненень пек стака. Мордовиянь Прявтось тешкстызе, неень шкань техникань ламот видтнэ уш роботыть республикань предприятиятнесэ. Ансяк сондензэ эряви седе ламо. Тесэ ламосо чумот вадря техниканть лангс питнетне. Секскак выставканть ванномсто кортавсь техниканть рамамосо лизингень схематнень тевс нолдамось.
Неень выставкась явовсь икеленсетнеде. Тедеде сонзэ участникекс ульнесть республикань крестьянонь-фермерэнь хозяйстватне. Мордовиянь эрьва районось невтизе велень хозяйствань кодамо производствасо важодить сынст фермертнэ. Тесэ ловсонь ды сывелень нолдамось, лишмень, ревень, нармунень трямось, мекшень ды калонь кирдемась. Владимир Волков явсь мель весенень. Фермертнэнь марто кортынзе стакачитнень ды маласо шкань аравтлувтнень.
Вана Ковылкина ёнксонь «Чураков» КВХ-сонть покш мель явить ракшань трямонтень. Абердин-ангусской породань сюракшов ракшатнеде хозяйствасост лововить 400. Те элитной породась шнави «мраморной сывеленть» кис.
Инжетненень невтизь те хозяйстванть ловсонь автоматтнэнь важодема лувонть. Кавто истят автоматт улить уш Ковылкинасо, маласо шкастонть 15 арсеви аравтомс Саранскойсэ.
Выставканть ванномсто Волков кевкстнесь крестьянонь-фермерэнь хозяйствань азортнэнь улить-арасть мелявксост продукциянть миеманзо коряс. Ташто Шайгова енксонь «Индейка Мордовии» вишка предприятиясь тень лангс а пеняци. Эсь продукциянть сынь миить Саранскойсэ ютавтовиця оймсемачинь ярмункатнесэ. Лиясто продукциясь весенень а сатныяк. Азортнэ кортыть, течи нармунень трямонь те сферась пек эрявикс.
А вана мекшень кирдицятненень тень коряс седе стака. Рынкасонть те продукциядонть пек ламо.
Экспозициятнень ванномсто Мордовиянь Прявтось башка мель явсь эште вейке покш мелявксонтень – республикань ветеринарной службась роботы лавшосто.
– А неяви хозяйстватнень марто кеме роботась. Тень коряс тешкставить ракшань ормат. Неень шкане ламо ракшат усковить омбо масторсто, секскак ветеринаронь службатненень эряви келейгавтомс эсь роботанть, тевс нолдамс профилактикань од лувт. Тенень явома седе покш мель ды решамат весе мелявкстнэнь, – мерсь Владимир Волков.
Критикань валт Прявтось ёвтась племенной роботанть коряскак. Тешкстызе, тесэ весемесь ашти хозяйствань прявттнэнь эйстэ.
Те иень агропромышленной выставкасонть невтезельть республикань весе районтнэяк. Кие-бути невтинзе эсь райононь кедьчелькев ломантнень, лиятне мель явсть раськень ярсамопельтненень, невтизь эсь ерокчист морамонь ансамблятнеяк. Республикань Прявтонть валонзо коряс, весемесь пек вадряль ды кепеди мель.
Весе экспозициятнень ванномадо мейле В.Д.Волков макссь кармавтомат республикань Правительствантень ды профильной министерстватненень. Теке марто велень хозяйствань отраслянь сехте вадря важодицятне те чистэнть казевсть МР-нь Прявтонь ды РФ-нь Велень хозяйствань министерствань Почетонь грамотасо ды Благодарностьсэ. Истя жо тешкставсть республикань ламбамо якстерькаень кастыця сехте вадря предприятиятне. Россиянь Сахаронь анокстамонь союзонь правлениянь председателесь А.Б.Бодин сынст казинзе дипломсо ды ёвтась мель поладомс вейсэнь важодеманть.
Седе тов мероприятиясь поладовсь Лямбирьсэ. Тесэ ютавтовсь промкс, косо кортавсь коромонь анокстамонь коряс кевкстемась. Промкссонть ульнесть райононь прявттнэ, конатнестэ ламотненень савсь толковамс мекс роботанть теить аволь эрязасто.
Владимир Волков тешкстызе, те иестэнть ламот районтнэ таго шкастонзо а урядыть коромонть. А эдь кизэнь чись, кода кортыть, ие анды. Читне пек псить, эште зярскак, ды весе тикшетне коськить, сестэ уш урядамс карми а мезе. Сехте пек тень коряс удалов кадовсь Зубова-Полянань районось.
Сехте парсте роботыть Ицялонь, Рузаевкань, Ковылкинань, Кочкуровань ды Инсаронь районтнэ. Тесэ анокстазь 40 % планонть эйстэ. Теке марто Мордовиянь Прявтось кармавты сынсткак седе капшамс ды июнень 15-це чинтень весе тевтнень прядомс.
Кортавсь промкссонть ловсонть коряскак. Зярыя районтнэсэ хозяйстватне кадовить удалов. Тень коряс В.Д.Волков алтась ютавтомс башка промкс ды толковамс весе мелявкстнэнь.
Паксясо тундонь роботатнень топавтоманть коряс кортась МР-нь Правительствань Председателень полавтыцясь – Велень хозяйствань ды продовольствиянь министрась Владимир Сидоров. Сон тешкстызе, тедеде видезь 482 тежат гектарт, мезесь 26 тежадо седе ламо ютазь иенть коряс. Площадтне ламолгавтозь малав весе культуратнень алов.
Тедеде хозяйстватненень максозь лезкс 1 миллиард 900 миллиононь покшолмасо, теке марто 660 миллионт макссь «Развитие села» ГУП-сь. Рамазь 40 тежат тоннат минеральной удобреният, 4,8 тежат тоннат видьметь, конатнестэ 110 тоннат суперэлитнойть ды 480 тоннат элитнойть. Те весемесь лездась роботатнень теемс шкань апак таргсе.
Владимир Сидоров мерсь, коромонть анокстамось течинь чине – васень тев. Теке марто а стувтома: сюронь урядамонтень весе техниканть анокстама шкасто. Тень коряс тевтне ушодовить уш июлень 10-15-це читнестэ. Неень шкане республикасонть лововить сюронь урядамонь туртов 1292 комбайнат ды ансяк пелест эйстэст маштовить. Тень коряс тевтнень кемекстазь ушодомс уш нейке.
Ю.Ерёмина

 
По теме
В Саранске на заседании комитетов Госсобрания по социальной политике и экономике, промышленности и предпринимательству обсудили организацию летнего отдыха и трудоустройства детей и подростков.
28 марта в 11 часов 40 минут на перекрестке улиц Гагарина - Республиканская в Саранске 37-летний водитель автомашины «Ауди А-7» при повороте налево не предоставил преимущество в движении служебной автомашине ДПС «ХАВАЛ»,
Экспертное злоключение - Столица С Перед Пролетарским райсудом предстал 35-летний сотрудник Республиканского бюро судебно-медицинской экспертизы Евгений Талышкин.
Столица С
56-ZwtMWG4A - Национальная библиотека им. А.С. Пушкина 27 марта сотрудники Национальной библиотеки им. А. С. Пушкина Республики Мордовия приняли участие в занятиях, которые прошли в рамках программы курсов повышения квалификации «Современная библиотека:
Национальная библиотека им. А.С. Пушкина