ЕЛЕНА АНЮШИНА – РОССИЯНЬ СБОРНОЕНЬ ЛИДЕР

 

Течинь чине масторсонок ды республикасонок покш мель явови спортонтень. Стявтовить спортонь ламо объектт, малав эрьва ёнкссонть улить неень шкань ФОК-т. Кенярдовты, эйкакштне ды од ломантне покш мельсэ яксить спортонь секциятнес, ламот икелепелевгак бажить сюлмамс эрямост спортонть марто, кочкамс сонзэ эрямонь тевекс. Мордовиясь сюпав содавикс спортсменсэ, минек ёнкссо чачозтнень лемест гайгить весе масторлангонть келес.

Елена Анюшинань лемезэ сеедьстэ гайги масторлангонь спортонь кулятнесэ. Те эрзянь тейтересь чачсь Орданьбуе ёнксонь Кеченьбие велесэ. 21 иесэ Елена – байдаркасо греблянь коряс Россиянь сборноень лидер. Неень шкастонть сон эри Бронницы ошсонть, тонавтни тосонь олимпийской резервань училищасонть, конась ловови академической греблянь коряс анокстамонь сехте вадря куншкакурокс. Спортсо изнявкстнэнь кис сонензэ максозь «Мастер спорта России международного класса» почётонь лемесь.

Вишкинестэ тейтересь, паряк, эзь арсекшнеяк – сонзэ эрямосо спортось ары васенце таркантень. Превскак эзь сакшно – карми содавикс спортсменкакс. Тевесь лиссь апак учо. Весть Мордовияв сакшнось Бронницы ошонь олимпийской резервань училищань содавикс тренерэсь Яков Яковлевич Костюченко. Тестэ сон вешнесь ёроков спортсмент училищасо тонавтнеманть туртов. Содавтызе Кеченьбие ёнксонтькак. Самай сестэ, школасо улемстэ, сон редизеяк Еленань. Эйкакштне спортзалсо налксесть волейболсо ды асодавикс инженть неизьгак аволь сеске. Я.Я.Костюченко жо парсте ваннось мельгаст: кода налксить, кинь кодамо физической анокстамозо. Тренерэсь сестэ сеске редизе Анюшинань. Ялганзо эйстэ сон явовсь сэрьсэ, теде башка, вадрясто ютызе физической анокстамонь коряс тестэнть: седе васов кирнявтсь, кепедевсь перекладинасо ды седе тов.

Истя, 14 иесэ Елена кармась Бронницы ошонь байдаркасо греблянь коряс олимпийской резервань училищань тонавтницякс. Нама, тейтерентень сестэ савсь пек стака. Овсе эйкакшокс савсь туемс тиринь кудосто, тетянзо-аванзо вакссто, туемс асодавикс ошов, косо арась вейкеяк малавикс ломань. Кода корты Елена, васень шкастонть аволь весть сакшность мельть кадомс весе неть тренировкатнень, пелькстамотнень ды велявтомс кудов.

– Эзинь велявто, цидярдынь, – тешксты Елена. – Ды арсян, изнямс неть стакачитнень, кемекстамс-тонадомс од таркантень лездась тень, паряк, эрзянь раськень обуцясь, нардевчись. Пек лездасть тень малавиксэнь, сынь кемсть: мон весементь цидярдса ды карман изницятнень ютксо.

Алкукс, малавиксэнзэ кемемась Еленанень лездась пек. Сон аламонь-аламонь тонавтнизе байдаркасо греблянь лувонть. А сёпи, ульнесь стака. Теке марто кенярдозь тешксты – весементень тонадсь пек куроксто. Эдь икеле тейтерентень вестькак эзь савкшно ойсемс венчс. Кеченьбиенть маласо покш эрькеть арасть, Раторонть видьс жо малав 30 вайгельпеть. Байдаркаяк Бронницасто сон несь васенцеде. Озавтызь эйзэнзэ ды кармавтызь уеме. Истя, эрзянь тейтеренть ушодовсь од эрямозо, конась целанек сюлмавсь спортонть марто.

Седе тов ушодовсть эрьва чинь тренировкатне, пелькстамотне. Весемесь човорявсь спортонть марто. Савсь ламо важодемс: кемекстамс организманть, пурнамс вийть. Изнямось а эрси шождакс, ансяк ули мезень кисэ максомскак неть вийтнень. Кода корты Елена, эрьва пелькстамосонть изнямось сонензэ канды а ёвтавикс ёжомарямо.

– Монь туртов астувтовикс эрьва изнямось, улезэ сон саезь куш покш, куш седе вишкине пелькстамосо. Сехте питнеекс жо ёвтавлия Германиясо масторлангонь чемпионатсонть Олеся Никишаева марто изнямонок. Те ульнесь васенце пелькстамонок масторонь томбале. Тесэ минь невтинек аволь ансяк эсенек прянок, невтинек весе Россиянть. Ды сеске истямо покш изнямо! Се шкастонть, зярдо ёвтызь Россиянть ды гайгсь минек масторонь гимнась – седеем пешкедсь каштанчиде. Бранденбургсо минь карминек масторлангонь кавксть чемпионкакс. Минь, Мордовиянь тейтертне, ськамонок Россиянь сборнойстэнть велявтынек кудов кавто сырнень медаль марто. Нама, покш изнявкст ульнесть лия пелькстамотнесэяк, васенцесь жо сехте талновтыця, – корты Елена.

Эрьва изнямодонть спортсменкась васенцекс пачти малавиксэнзэ туртов – тетянстэнь-аванстэнь ды Сергей лелянстэнь. Весе медалензэяк уски тиринь кудов, Кеченьбиев. Тетязо тосо сынст весе пурны вейс ды вансты. Елена сыненст ёвты покш сюкпря. Сынь свал лездыть лембе, седейстэ ютыця валсо, паро арсемасо. Фёдор Сергеевич ды Валентина Анатольевна – васень болельщикть. Сынь свал кемить тейтерест вийтнес ды эрьва пелькстамодонть икеле оймавтыть сонзэ. Нама, Еленанень тиринь кудосо эрсемс савкшны пек чуросто, ансяк эрьва истямо самось эсензэ ды малавиксэнзэ туртов покш кеняркс.

– Васенце шкастонть пек бажинь кудов, тетянень-аванень, –  корты Елена. – Ней уш аволь истя, тонадынь од таркантень. Икеле яла кудов пек сеедьстэ сайнимим Я.Я.Костюченко тренерэм. Сон, кода ансяк пурны минек ёнксов, ваномо, кода молить тевтне базасонть (Орданьбуесэ важоди байдаркасо греблянь коряс олимпийской резервань училищань филиал), свал сайсамам мартонзо.

Яков Яковлевичнень мон бу ёвтавлинь покш сюкпря. Сон – превей, тевензэ вадрясто содыця специалист. Сон соды, зярдо минек шнамс, зярдо жо аламодо сёвномс. Пельденек жо свал учи ансяк вадря невтевкст. Изнямодо мейле свал ёвты поздоровт.

Маласо шкантень Еленань арсеманзо – поладомс байдаркасо греблянть. Минь арсетяно те эрзянь ёроков тейтерентень ансяк изнявкст ды весе арсезенть эрямос совавтоманзо!

 

Ю.Еремина

 
По теме
Представить жизнь без интернета в современных реалиях — невозможно. Доступ ко всемирной паутине сейчас не только позволяет оперативно узнать и распространить информацию, но и качественно оптимизировать образовательный процесс.
В Мордовии подвели итоги специальных рейдовых мероприятий на транспорте - Вечерний Саранск Сотрудниками УФСБ России по Республике Мордовия во взаимодействии с региональными МВД и Росгвардией с 11 по 19 марта проводился внеочередной этап совместной спецоперации «Анаконда»,
Вечерний Саранск
Гепатит С - вирусное заболевание, которое может протекать в острой и хронической форме, притом частота хронизации этой инфекции очень высока: до 85% случаев.
Роспотребнадзор