ФЕРМЕРЭНЬ АССОЦИАЦИЯНЬ ПРОМКС

 

МР-нь Велень хозяйствань ды продовольствиянь министерствасо умок уш истянь зняро ломанть арасельть. Тувталось – тесэ ютавтозель «Нива» МР-нь крестьянско-фермерской хозяйствань ассоциациянь вейсэнь промксось, косо ванкшновсть 2014 иень важодемань итогтне ды ютавтозельть исполнительной директоронь кочкамотне. Промксов сакшность ведьгеменде ламо крестьянско-фермерской хозяйствань азорт.

Пурнавозтненень приветственной валт ёвтась МР-нь Велень хозяйствань ды продовольствиянь  министрань полавтыцясь Т.М.Маланкина. Сон тешкстызе, республикань крестьянско-фермерской хозяйствань азортнэнь покш таликаст республикань агропромышленной комплексэнть виевгавтомасо. Мелят республикань аграрийтне сайсть 1 миллиондо ламо тоннат сюро, ламбамо якстерькай, ламо тоннат сывель, ловсо ды истя седе тов. Теньсэ, нама, покш путовксост крестьянско-фермерской хозяйстватненьгак. Сынь сайсть 122 тёжат тоннат сюро, 23 тёжат тоннат ловсо, малав 7 тёжат тоннат модамарь, 33,7 тёжат тоннат ламбамо якстерькай, 560 тоннат эмежть.

МР-нь Велень хозяйствань ды продовольствиянь министерствась «Нива» МР-нь крестьянско-фермерской хозяйствань ассоциациянть марто вейсэ эрямос совавтыть «Поддержка начинающих фермеров в Республике Мордовия на период 2013-2020 годы» ды «Развитие семейных животноводческих ферм на базе крестьянских-фермерских хозяйств Республики Мордовии на 2013-2020 г.г.» программатнень эрямос совавтомасонть. 2014 иестэ 270 фермерт сайсть субсидият. Сынь лездыть ушодыця фермертнэнень кеместэ стямс пильге лангс.

Седе, кода течи эри республикань «Нива» крестьянско-фермерской ассоциациясь, кодамо сонзэ таликазо агропромышленной комплексэнть виевгавтомасо, мезе эряви теемс маласо шкастонть? – теде ды лиядо ёвтнесь эсь докладсонть «Нива» МР-нь крестьянско-фермерской хозяйствань ассоциациянь исполнительной директорось В.И.Данейкин. Сонзэ валонзо коряс, республикасонть лововить 1170 индивидуальной предпринимательть ды крестьянско-фермерской хозяйствань азорт, кинь эрямост сюлмавозь велень хозяйстванть марто.

2014 иестэ ламо ламбамо якстерькай таргасть фермертнэнь  Т.Н.Зиновьевень (Ицялонь район) ды «Простор» (Кочкуровань район) хозяйстватнесэ. Модамарь кастыть фермертнэ А.Р.Курмакаев (Лямбирень район), А.И.Кандрашкин (Отяжелень район), В.М. ды И.Л.Ямашкинтнэ (Чаунзань район), С.Я.Ежов (Ковылкинань район) ды лиятне.

Фермерэнь хозяйстватне, кить важодить ракшатнень марто, кирдить 18,3 тёжат скалт. Сынь мисть 23 тёжат тоннат ловсо, 2,1 тёжа тоннат сывель.

Прядовсь «Поддержка начинающих фермеров РМ на период 2012-2014 годы» целевой программанть эрямос совавтомась. Республикань фермертнэ ламолгадсть 236 ломанде, конат получасть КФХ-нь теемс грантт федеральной бюджетстэ 184,3 миллионт целковойть ды республиканскойстэ – 46,0 миллионт целковойть. Весемезэ – 257,2 миллионт целковойть.

2014 иенть прядовомсто «Поддержка начинающих фермеров в РМ на период 2012-2014 г.г.» программань участниктне грантонь ярмактнень лангс рамасть 2580 скалт, тень ютксо – 1000 потявтовицят ды сывелекс породань, 62 «МТЗ» тракторт, строявить ды витневить 94 мини-фермат.

Докладонь теицясь ёвтынзе сетнень, кить строясть скалонь фермат. Ютксост – Е.Б.Кудашкина (Орданьбуень район), Г.Н.Заева, А.А.Афанасьев, В.Н.Тюгаев, М.Л.Чугунов (Дубенкань район), А.А.Кулагин, А.Н.Минеева (Ковылкинань район), А.Н.Миронов (Инсаронь район) ды ламо лиятне, конат течи микшнить ракшань продукция.

Покш важодема ютавтозь ракшань печкемань 17 пунктонь строямсто. Сынь строязь парсте, отвечить неень шкань вешематненень. Течи васень тевесь – сынь важодевельть ды азортнэнень кандовольть ярмакт, сюпавчи. Ансяк меельце шкастонть тень коряс тевтне а кецявтыть. Велень эрицятнестэ ламотне эсь кардазо а кирдить  ракшат.

Шкась вейке таркасо а ашти. Сюронь, ламбамо якстерькаень, лиянь-мезень кастомасо тевс нолдавить од технологият. Тень эйстэ ве ёнов эзть кадово республикань фермертнэяк. Сынь рамить од техника велень хозяйствань тевтнень топавтомс. Невтемга, фермерэсь В.В.Сорокин, кона эри Зубова Полянань районсо, рамась виев «Бюллер» трактор ды эйзэнзэ эрьва кодамо прицепной инвентарь. Тень кувалма, Виктор Викторович, шкастонзо ютавты паксянь тевтнень ды 2014 иестэ эрьва гектарсто сайсь 18,9 центнерт сюро, 30 центнерт пинеме. Сон истя жо парсте витнизе скалонь ферманть, тезэнь аравтсь скалонь потявтомань неень шкань оборудования. Ней тосо кедьвийсэ а теевить кодаткак тевть.

Чаунзань районсто фермерэсь В.М.Ямашкин рамась модамарень кастомань зярыя машинат. Ды овсе а янкси! 2013 иестэ пиземетне валсть ды валсть. Тень лангс апак вано, фермерэсь шкастонзо таргинзе ды микшнинзе модамартнень. Республикань ламо фермертнэ одкстомтыть эсь тракторонь парконть.

В.И.Данейкин эсь докладсонть покш мель явсь велень хозяйствань кооперациянтень, конань совавтыть эрямос фермертнэ. Дубенкань районсто А.П.Чичайкинань ули эсь кооперативезэ. Сон парсте витнизе скалонь ташто ферманть ды теизе ракшань печкемань пунктокс. Тень пингстэ велень эрицятненень лезды ракшатнень миемстэ.

Эсь лавка панжсь Вармазейка велесэ, кона ашти Покш Игнатовань районсо, фермерэсь В.Ю.Кабаев. Тень кисэ велень эрицятне тензэ ёвтыть покш сюкпря. Сонзэ лавканзо питне-пезэ арась.

Лавкаст ули фермертнэнь Ямашкинтнэньгак, конат эрить Чаунзань райононь Отрадное велесэ.

Тешкстасынек, «Нива» КФХ-нь ассоциациясь свал эрси выставкатнесэ ды ярмункатнесэ, конат  ютавтневить минек республикасо. Лямбирень райононь «Александровский» ОАО-нть юрсо кавто иеть мельцек  ютавтозель «Паксянь чи – 2014» агропромышленной выставкась.

«Фермерэнь чи» кенярксчинть тешкстамсто «Нива» КФХ-нь ассоциациясь выставканть юрсо невтсь продукция, конань нолдыть-кастыть республикань фермертнэ. Эсь продукцияст невтнизь ушодыця фермертнэяк, «Ушодыця фермер» программанть эрямос совавтыцятне.

Республикань фермерэнь хозяйстватне участвовасть «Деловая Мордовия-2013» ды «Деловая Мордовия-2014» раськеютконь выставкасонть, конат ютавтозельть «Мордовэкспоцентрасо». Эрицятненень микшневсь 30 видэнь велень хозяйствань продукция, кона нолдави эсь хозяйствасо.

Тешкстасынек, ассоциациясь касты фермертнэнь ёрокчисткак. Ушодыця фермертнэ тонавтовить «МР-нь велень хозяйствань специалистэнь практической тонавтомань центрасонть».

Течи мезе ацирьгавты республикань фермертнэнь? Крестьянско-фермерской хозяйстватнень лепштить ГСМ-нть, гербицидтнэнь, удобрениятнень, электроэнергиянть, сэнь уштомапеленть лангс питнетнень касомась, велень хозяйствань продукциянть пек дёшовасто микшнемась.

Промкссонть талновтыцядонть, эсь мелест-арсемаст ёвтызь Отяжелень райононь «Азор» крестьянско-фермерской хозяйствань азорось А.И.Кандрашкин, Ковылкинасто фермерэсь  А.А.Кулагин, республикань мекшень кирдиця ассоциациянь председателесь С.В.Юматов, лиятне. Сынь састь ве мельс: крестьянско-фермерской хозяйствань ассоциациясь республикасонть эряви. Ацирьгавты – банктнесэ кредитэнть максыть покш процент лангс, кой-конатне овсе а максытькак. Те арази тев?! Эдь фермертнэ – велень ванстыцят.

Мейле ульнесть МР-нь «Нива»  крестьянско-фермерской хозяйствань ассоциациянь исполнительной директоронь кочкамотне. Ве мельсэ колмо иес кочказь В.И.Данейкин.

Меельцекс делегатт кочказь Россиянь фермерэнь 26 промксс, кона ютавтови Московсо.

 

П.Зиновьев

 
По теме
27 марта сотрудники Госавтоинспекции МВД по Республике Мордовия провели оперативно-профилактическое мероприятие «Чистый номер».
В Мордовии прошла спецоперация «Анаконда» - ИА Медиа Ток Фото: Пресс-служба МВД по Республике Мордовия 28 марта. /MEDIA-TALK/.Ее цель - предотвращение и пресечение транспортировки наркотиков, оружия, других предметов или веществ, запрещенных к гражданскому обороту.
ИА Медиа Ток
В Мордовии подвели итоги специальных рейдовых мероприятий на транспорте - Вечерний Саранск Сотрудниками УФСБ России по Республике Мордовия во взаимодействии с региональными МВД и Росгвардией с 11 по 19 марта проводился внеочередной этап совместной спецоперации «Анаконда»,
Вечерний Саранск
Гепатит С - вирусное заболевание, которое может протекать в острой и хронической форме, притом частота хронизации этой инфекции очень высока: до 85% случаев.
Роспотребнадзор