Июнень 22-28-це читнестэ ютась «Волга – река мира. Диалог культур волжских народов» Раськеютконь этнокультурань экспедициясь-фестивалесь. Тедеде сон алтазель Литературань иентень ды Ине Отечественной войнасо Изнямонь 70 иетненень. Истямо фестивалень пурныцятне: РФ-нь Культурань министерствась, МР-нь Национальной политикань коряс министерствась, Эрзянь ды мокшонь раськень регионъютконь общественной вейсэндявксось.
«Валерий Чкалов» теплоходось эсь кинзэ ушодызе Самарасто (лия иетнестэ участниктне сыргакшность Саратовасто). Мейле ульнесь Казаньсэ, Чебоксарсо, Козьмодемьянскойсэ, Нижней Новгородсо ды Макарьевкасо.
Экспедициянтень пурнавсть малав сядо ломанть: учёнойть, писательть, журналистт, тонавтыцят, культурасо важодицят, эрьва кодамо ёнкссто национально-культурной автономиянь прявтт. Тесэльть Мордовиянь районтнэстэ ды республикань томбальде. Весень сынст туртов арсезель важодемань покш программа.
Васняяк весе инжетнень вастсть Самарасо. Рав чирев сакшность Самарань губернаторонь Администрациясто, национально-культурной общественной вейсэндявксонь прявттнэ. Теплоходонть вакссо ушосо панжовсь экспедициясь, гайгезевсть вейсэнь содавикс моротне. Лембе вал марто пшкадсь МР-нь Национальной политикань коряс министрань васенце полавтыцясь, экспедициянь прявтось А.И.Карьгин. Сон ёвтась лембе валт МР-нь Прявтонть В.Д.Волковонь пельде.
Секе жо чистэнть ушодовсть кругловой стольтне ды семинартнэ, конатнесэ кортамось мольсь, кода финнэнь-угрань раськетне кемекстасть Россиянть, ванновсь РФ-нь государственной национальной политикань коряс Стратегиянть СМИ-тнесэ пачтямозо, эрзянь ды мокшонь кельтнень тонавтомаст Саранскоень школатнесэ. Эряви меремс, лия ёнкстнэнь коряс, минек республикасо тевтне молить аволь беряньстэ. Информационно-методической куншкакуронь этнокультурной образованиянь прявтось М.М.Вельмякина пачтясь мониторингтенть, кона ютась ошонь школатнесэ. Истя, ванномась невтизе, эрзянь келесь ветяви седе ламо школатнева. Эйкакштненень ды тетятненень-аватненень паро ули, зярдо мереви кочкамс се келенть, конань бажить тонавтнемс. Неень шкане тень лангсо моли важодема, вешневить мокшонь келень тонавтыцят. Келень тонавтомасо вадря невтевксэкс аштить лия региононь школатнеяк. Те: Башкортостан ды Ульяновск ёнкстнэ.
Омбоце чистэнть экспедициянть вастсть Казаньсэ. Кезэрень ошонть копачизь раужо пельть, ды кармась валомо виев пиземе. Аламо шкань ютазь весе те вармась-зэртесь прядовсь. Тесэ эйсэнек учость «Татарстанонь Ояксчинь кудонь» прявтось И.И.Шарипов, Татарстанонь раськетнень Ассамблеянь Советэнь исполкомонь прявтось Н.М.Владимиров. Инжетнень туртов невтезель аволь покш концерт. Теде мейле весе сыргасть Советской Союзонь Героенть, содавикс лётчикенть, МР-нь Почётной гражданинэнть М.П.Девятаевень калмонзо лангс цецянь путомо.
Лембе вастовома эйсэнек учось Чебоксары ошсо. Тесэ эриця эрзятне каванясть кшиде-салдо ды пиядо. Чувашиясо те чистэнть ульнесь Республикань чи, весе оймсесть. Эрьва ёндо гайгсть морот. Ошонть куншкасо сцена лангсо морасть ансяк чувашонь кельсэ. Сельменек сявадозевсть, минек истя а эрси.
Теке жо чистэнть экспедициясь лотксесь Марий Элэнь Козьмодемьянск ошонтень. Минек сайнимизь менель ало аштиця этнографиянь музеев. Сонензэ явозь 5 гектарт мода. Музеесь ашти сэрей таркасо, парсте неяви Равось. Тесэ невтевить горномариецтнэнь коест-кирдаст. Мазыйдеяк мазый комплексэсь панжозель 1983 иестэ. Тесэ стявтозь алкуксонь кудот, кузниця, утом, баня, ведькев. Вейс пурназь малав 2 тёжат экспонатт. Музеень важодицятне вечксызь ды содасызь эсь тевест. Сынь анокт ёвтнемс весемеденть апак лотксе. Ансяк шкась эзь максо кувать кирдевемс. Те ошсонть улить зярыя музейть. Саемга, А.В.Григорьев лемсэ художественно-исторической музейсэ ванстовить Айвазовскоень, Кандинскоень, Коровинэнь, Машковонь, Малявинэнь ды лия содавикс артыцятнень важодевксэст.
Седе тов «Валерий Чкалов» теплоходось пачкодсь Нижний Новгород ошов. Тесэ ютавтозель «Программно-целевой подход в сфере реализации государственной национальной политики Российской Федерации» Кругловой столь. Ветясь сонзэ Нижегородской областень внутренней региональной ды муниципальной политикань министрась С.И.Рогожкин. Сон тешкстызе, сынь покш мельспаросо вастыть истямо экспедициянть. Нижней ёнкссо эрить малав сядо эрьва кодат раськеть, нама, эрсить стакачитькак, конатнень лангсо важодить весе вейсэ. Сёксня Нижней Новгородсо юты РФ-нь раськетнень Конгресс.
Вастовомасонть тешкстазель, экспедициясь пурнавсь эрзятнень ды мокшотнень кезэрень чачома тарказост. Тесэ чачсть ламо содавикс ломанть. Кода невти 2010 иень сёрмадстомась, областьсэнть эрить 19 тёжат эрзят ды мокшот. Иеде иес ков-бути ёматано… Саемга, терюхантнэ ней уш арасть.
Кода ванстови эрзятнень ды мокшотнень раськень культураст, кодамо лезкс юты койтнень-кирдатнень вельмевтемасо – теде докладт ловность Покш Болдина ёнксонь Культурань, туризмань ды спортонь управлениянь прявтось Н.А. Жиркова ды «Лисьмапря» Лукоянова ёнксонь эрзянь-мокшонь национально-культурной автономиянь прявтось М.К.Голодова. Покш Болдина ёнкссо кавто покш эрзянь велеть – Пикшня ды Пермиёва. 2010 иестэ Пикшнясо панжозель эрзянь культурань музей. Тей сакшныть ламо инжеть. Эрьва иестэ апрельстэ школасо тешкстыть Эрзянь келень чи. Велесэнть ули «Чилисема» фольклоронь ансамбля. «Встречаем гостей по-эрзянски» – те велень истямо проектэсь сайсь грант. «Чилисемась» натой ардтнесь Московов.
Лукоянова ёнкссо 11 эрзянь ды 2 мокшонь велеть. М.К.Голодова домкасто ёвтнесь сынст районсо ютавтовиця «Эрзянь Лисьмапря» покш фестивальденть, кона эрси эрьва иестэ Од веле вакссо Этнопарксонть. Тедеде сон карми июлень 18-це чистэ. Эряви меремс, ламо таркава, косо эрить эрзятне ды мокшотне, ютыть раськень покш кенярксчить.
Башка кортамо пурназель экспедицияв сазь журналисттнэнь марто. Тесэ ульнесть Мордовиянь, Самарань, Псковонь, Марий Элэнь ды Дагестанонь журналисттнэ. Промксонть ветясь Межэтнической журналистикань гильдиянь прявтось, «Радио России» ГРК-нь прявтонь советникесь М.А.Лянге. Тесэ эрьвась ёвтызе эсь мелензэ раськетнень ютксо стакачитнеде СМИ-тнесэ пачтямодо.
Лия мельстуиця кортамо мольсь «Угрозы разжигания межнациональных конфликтов посредством Интернет-ресурсов» семинарсонть. Неень шкане истят апаро тевть вастневить сеедьстэ. Ды сынст эряви шкастонзо кардамс минек правоохранителень органтнэнень.
Экспедициясонть ютавтозель пек вадря литературно-музыкальной чокшне. Тесэ морасть морот, эсь произведенияст ловность Николай Ишуткин, Вера Брындина, Владимир Нестеров, Алина Подгорнова ды Виталий Картышкин од автортнэ.
Эрьва чокшне теплоходсонть минек артисттнэ невтсть концертт. Сынст ваномо сакшность весе: экспедициянь участниктне, лия туристтнэ, тесэнь важодицятне. Истя, ютась «Сон морась Рейхстагонь кузтема лангсо» военной моронь чокшне, кона алтазель ине морыцянть Лидия Руслановань чачома чистэнзэ саезь 115 иетненень. Эсь мазый морост казсть МР-нь Заслуженной артисттнэ Оксана Глебова ды Татьяна Ломакина, Весероссиянь ды Раськеютконь морамонь пелькстамонь изницятне Ксения Громова ды Лилия Ямбушева, истя жо Елизавета Лисина, Артём Мамаев, Михаил Гавин, Самарань Виктор Рауткин, Рузаевка ёнксонь «Тяштеня» фольклоронь ансамблясь. Весень туртов баянсо седясь МР-нь культурань заслуженной роботникесь В.С.Родионов.
Экспедициясонть кепедевсть ламо кевкстемат, кортазель ламо темань коряс. Косо эрявсь – эрьвась ёвтызе эсь мелензэ. Сы иестэнть ушодови «Равось – ояксчинь лей» XV юбилеень экспедициясь-фестивалесь.
Т.Маторкина
Равось – ояксчинь лей!
Источник: Газета Эрзянь правда
08.07.2015 17:36