Журналистэнь фестивалесь Чаунзасоль



Ютазь пецясто республикань журналисттнэ пуромкшность райононь прессань XVIII фестивалентень, конась алтавсь Ине Отечественной войнасо Изнямонь 70 иетнень топодемантень. Сядодо ламо инжеть Саранскойстэ ды республикань районтнэстэ пуромсть Чаунза ёнксонь Комсомольский посёлкасо «Цементник» Культурань кудонтень. Фойесэнть невтезель кедьчелькев, эрьва мезень тееме маштыцятнень выставкась.
Фестивалев сыця прявт редактортнэ, ответственной секретартне ды журналисттнэ ёвтнесть опыттэст, тонавтнесть вейкест-вейкест эйстэ ёроковсто сёрмадомо, эрьва райононь редакциясь тов пачтизе эсь изданиянть. Эдь райгазетатне ков седе малавикст ломантненень, сынст эрьва чинь мелявкстнэнень.
Торжественной пельксэсь ушодовсь актовой залсо невтевиця документальной фильмань кадратнестэ. Васенцекс пуромозтненень поздоров марто пшкадсь МР-нь Печатень ды информациянь министрась В.В.Маресьев. Сон ёвтызе те кенярксчинть райононь прессанть туртов иень сехте покш тевекс, косо журналисттнэ аволь ансяк тевде кортасть, истя жо максовсть казнеть эрьва кодат ёроков пелькстамотнесэ.
Чаунзань райононть кезэрень шкадо, течинь изнявкстнэде, тевтнеде журналисттнэнень пачтясь Чаунзань муниципальной райононь Администрациянь прявтось В.Г.Цыбаков. Вячеслав Геннадьевич мельспаросо тешкстызе сёрмадыцятнень путовксост республикань ды районтнэнь социально-экономиканть виевгавтомасо, од тевень ушодомасо.
Главной федеральной инспекторонть пельде паро арсематнень ловнынзе сонзэ советникесь Наталья Новикова.
Кода свал эрси покш тевтнесэ, икеле истямо мероприятиянь ютавтыцясь (мелят те событиясь ульнесь Ельник ёнкссо) максы фестивалень ютавтыцянтень «Ледстнемань книганть». Теевезь коенть эйстэ эзть пота те иестэнтькак. Чаунзань райононь «Знамя» газетань редакторось Вероника Нагиева эстафетанть саемстэ алтась поладомс икеле таштазенть ды эскельдямс икелев. Сон ледстизе, сы иестэ сынст газетантень топодить 85 иеть. Те шканть перть те изданиясь теевсь алкуксонь кадрань анокстыцякс ды свал од кулянь пачтицякс.
Фестиваленть ютамсто райгазетатнень ютксо теевсть итогт икеле яволявтозь конкурстнэнь коряс. Изницятнень ютксольть: «Маяк» – Орданьбуестэ, «Трудовая правда» – Ташто Шайговасто, «Присурские вести» – Покш Березникстэ, Лямбирень «Призыв» творческой коллективтне.
Те покш сценанть лангсто СМИ-сэ сехте парсте важодицятнень казизь кода Россиянь, истя Мордовиянь прявттнэнь пельде. Од журналисттнэнень торжественнасто макссть Россиянь журналистэнь удостовереният.
Пурнавозтненень невтезель концертэнь паро программа, конась алтавсь Ине Изнямонь 70 иетненень.
Седе тов инжетненень невтезель краеведческой музеесь, косо се шкане невтезель Ине Отечественной войнасо Изнямонь 70 иетненень алтазь выставкась. Истя жо тосо ванстовить кезэрень шкань ламо курмот-кармот. Весе экспонаттнэнь коряс паро экскурсия ютавтсть музеень важодицятне.
Кувать шкань ледстнемакс журналисттнэнень кадови «МагМа» ООО-нь производстванть ваномась. Зданиянть икеле минек вастымизь те компаниянть прявтось Алексей Иванович Анников. Сон минек ветнимизь производствань цехтнева, конат таргавсть вайгельпеде седе ламо таркава.
Строямонь коське човорявксонь теиця предприятиясонть весе операциятне топавтовить автоматиканть вельде. Те предприятиянть ули эсензэ лабораториязо, косо весе компоненттнэ ютыть ГОСТ-нть ладямонзо вельде. Тосо нолдавиця продукциясь микшневи аволь ансяк минек республикасо, истя жо ильтяви сонзэ томбалевгак.
Производстванть ванкшномадо мейле те предприятиянь прявтось Алексей Иванович Анников макссь каршо валт журналисттнэнь ламо кевкстемаст лангс.
Койсэнек, истят фестивальтне сёрмадыцятненень аволь ансяк невтить, кода течи эрить ломантне республикань районтнэсэ, истя жо вейсэндить ды лездыть-тонавтыть вейсэнь тевень топавтомо.
В.Юдина

 
По теме
28 марта в 11 часов 40 минут на перекрестке улиц Гагарина - Республиканская в Саранске 37-летний водитель автомашины «Ауди А-7» при повороте налево не предоставил преимущество в движении служебной автомашине ДПС «ХАВАЛ»,
Экспертное злоключение - Столица С Перед Пролетарским райсудом предстал 35-летний сотрудник Республиканского бюро судебно-медицинской экспертизы Евгений Талышкин.
Столица С
56-ZwtMWG4A - Национальная библиотека им. А.С. Пушкина 27 марта сотрудники Национальной библиотеки им. А. С. Пушкина Республики Мордовия приняли участие в занятиях, которые прошли в рамках программы курсов повышения квалификации «Современная библиотека:
Национальная библиотека им. А.С. Пушкина